ದುರಂತ

ನಾವೆಲ್ಲರೂ ಕಂಡ ಹಾಗೆ
ರೊಟ್ಟಿ ಮಾಡುವದರಲಿ ಒಂದೇ ಬಗೆ.
ನೀರು ಹನಿಸಿ ಹಿಟ್ಟಿಗೆ,
ಕಲೆಸಿ ನಾದುವರು ಮೆತ್ತಗೆ.
ಕಣ ಕಣಗಳೂ ಬೆರೆವ ಹಾಗೆ,
ಬಿಡಿಸಲಾರದ ನಂಟಿನ ಬೆಸುಗೆ.
ಕಟ್ಟಿದ ಉಂಡೆಯನು ಮೆಲ್ಲಗೆ,
ತಟ್ಟಲಿ ಅಂಗೈಗಳ ನಡುವೆ,
ಲಟ್ಟಿಸಲಿ  ಮಣೆಗಳ ಮೇಲೆ,
ಒಡ್ಡಲಿ ಅಗ್ನಿಪರೀಕ್ಷೆಗೆ,
ರೊಟ್ಟಿ ಮಾತ್ರ ಗುಂಡಗೆ.

ಆದರೆ,
ರೊಟ್ಟಿ ಬಿದ್ದರೆ ಕಂಗಳಿಗೆ
ಬಗೆ ಬಗೆಯಲಿ ಬಗೆವಾಸೆ ಎಲ್ಲರಿಗೆ.
ಹಿತವಾಗಿ ಬಳುಕುವಾಗ,
ಒಣಗಿ ರಟ್ಟಿನಂತಿರುವಾಗ,
ಮುರಿಮುರಿದು ನಾಲ್ಕಾರುಬಾರಿ,
ಪದರು ಪದರಾಗಿ ಹೇಗೆ ಬೇಕೋ ಹಾಗೆ,
ಕೆಂಪು ಮೆಣಸಿನ ಪುಡಿ,
ತರಹೇವಾರಿ ಮಸಾಲೆ ಪಲ್ಲೆ,
ಇಂಥ ವ್ಯಂಜನಗಳ ಜೊತೆಗೆ,
ಹಲ್ಲುಗಳ ಮಿಲ್ಲಿನಲಿ,
ನುಣ್ಣಗೆ ಅರೆದು,
ಹಿಂಡಿದ ರಸ ಹೀರಿ,
ನುಂಗಿ ನೀರು ಕುಡಿಯುತ್ತಾರೆ - 
ಈ ರೊಟ್ಟಿ ಆಕ್ರಂದನ ಮಾಡದ ಹಾಗೆ,
ಮತ್ತೆ ಉಸಿರೆತ್ತದ ಹಾಗೆ.



ಟಿಪ್ಪಣಿ:

ಈ ಬ್ಲಾಗಿನಲ್ಲಿಯ ಮೊದಲನೆಯ ಕವನ "ಬೇಡ ಕೃಷ್ಣಾ ರಂಗಿನಾಟ" ಕುರಿತು ಒಂದು ಚಿಕ್ಕ ವಿವರಣೆ ನೀಡುವುದು ಸಮಂಜಸವೆಂದು ಅನಿಸಿದೆ. ಇಲ್ಲಿ, ೭೮೬- ಒಂದು ಸಮುದಾಯವನ್ನು ಪ್ರತಿನಿಧಿಸಿದರೆ (ಮುಸ್ಲಿಂ ಸಮುದಾಯ), ರಾಧೆ ಇನ್ನೊಂದು ಸಮುದಾಯವನ್ನು ಪ್ರತಿನಿಧಿಸುತ್ತಾಳೆ. ಒಟ್ಟಾರೆಯಾಗಿ ಈ ಕವನ, ಸಮಾಜದ ಸಾಮರಸ್ಯ ಹದಗೆಡುತ್ತಿರುವುದನ್ನು ಬಿಂಬಿಸುತ್ತದೆಯೆಂದು ಅಂದುಕೊಂಡಿದ್ದೇನೆ. ವಿವರಣೆಯನ್ನು ತಡವಾಗಿ ನೀಡುತ್ತಿರುವುದಕ್ಕೆ ಕ್ಷಮೆ ಇರಲಿ.