ಯಾಕೆ ಈ ಸಂಜೆಯ ಆಕಾಶ
ಒಬ್ಬರ ರಟ್ಟೆಯ ಸೊಕ್ಕಿಗೆ,
ಇನ್ನೊಬ್ಬರ ಬಧ್ಧ ವೈರಕ್ಕೆ,
ಮತ್ತೊಬ್ಬರ ಸ್ವಾರ್ಥಕ್ಕೆ, ದುರಾಸೆಗೆ,
ಮತ್ಯಾರದೋ ಧನ ದಾಹಕ್ಕೆ, ಭೂ ದಾಹಕ್ಕೆ,
ಧರ್ಮ ಸಂಸ್ಥಾಪನೆಯಾಸೆಗೆ, ಚಕ್ರಾಧಿಪತ್ಯದಾಸೆಗೆ,
ಕಾರಣವಲ್ಲದ ಕಾರಣಕ್ಕೆ,
ಬದುಕ ಗೆಲ್ಲಲು ಸೋತು,
ಅದಿಲ್ಲದಿರೆ, ಸಾವ ಗೆಲ್ಲಲು ಹೋರಾಡಿ,ಆಹುತಿಯಾದ ಅಮಾಯಕರ,
ಎದೆಯಿಂದ ಹರಿದ ನೆತ್ತರಿನ ಓಕುಳಿಯಲಿ
ಆಗಸದ ನೀಲ ಅಂಗವಸ್ತ್ರವನು
ಅದ್ದದ್ದಿ ಹರಡಿದ ಹಾಗೆ,
ಎಲ್ಲವೂ ಬೆಂಕಿಯಲಿ ಹೊತ್ತಿ ಉರಿದು,
ಉಳಿದ ಬೂದಿಯಲಿ ಮುಚ್ಚಿದ ಕೆಂಡದ
ಮಂದ ಬೆಳಕಿನ ಹಾಗೆ,
ವಿಷಣ್ಣ ಭಾವವ ಸುರಿವ
ನೀರವ ಸ್ಮಶಾನ ಮೌನದ ಹಾಗೆ,
ಕಾಣಿಸುವುದೋ ನನಗೆ.
ಟಿಪ್ಪಣಿ:
ಮೇಲಿನ ದೃಶ್ಯವನ್ನು ಸೆರೆಹಿಡಿದದ್ದು ಅಮೇರಿಕದ, ಟೆಕ್ಸಸ್ ರಾಜ್ಯದ "ಸ್ಯಾನ್ ಎಂಟೋನಿಯೋ"ದಲ್ಲಿ. ಟೆಕ್ಸಸ್ ಬಂಧವಿಮುಕ್ತಗೊಳ್ಳುವದರಲ್ಲಿ ಸ್ಯಾನ್ ಎಂಟೋನಿಯೋ ರಕ್ತಕ್ರಾಂತಿ ಮಹತ್ವದ ಪಾತ್ರವಹಿಸಿದೆ. ಇಲ್ಲಿರುವ ಚಿತ್ರ ಅಲ್ಲಿಯ ಯಾವುದೋ ಒಂದು ಕಟ್ಟಡದ ಕೊನೆಯಂತಸ್ತಿನ ಭಾಗವಾಗಿದ್ದು, ದ್ವಜ ಅರ್ಧಕ್ಕೆ ಹಾರಾಡುತ್ತಿರುವ ಕಾರಣ ಮಾತ್ರ, ನನಗೆ ಪ್ರಶ್ನೆಯಾಗಿಯೇ ಉಳಿದಿದ್ದರೂ, ಬರಹಕ್ಕೊಂದು ಭಾವ ನೀಡಿದೆಯೆಂದೆನಿಸುತ್ತಿದೆ.
